KORONADAL CITY- Nagapangasubo karun ang pamilya sang isa ka 9 anyos nga bata nga babayi nga ginlugos kag brutal nga ginpatay sa banwa sang T’boli, South Cotabato.

Ang nasambit nga biktima ang ginkilala lang sa alyas nga Nikka isa ka Grade 3 pupil sa isa ka pampubliko nga buluthuan sa nasambit nga banwa.

Nagluntad suno pa ang pagpanglugos isa ka gab-i sa suludlon nga bahin sang Brgy. Poblacion Tboli, South Cotabato kun sa diin suno sa inisyal nga impormasyon, magatambong kun tani sa Seslong festival ang nasambit nga bata kun sa diin samtang nagapanglakaton ini sa dalan gulpi na lang ini ginbutong sang 5 ka mga kalalakihan kag gindala sa madulom nga bahin sang lugar kag didto na ini ginlugos sang mga suspek kag wala pa makuntento bangud ginbuno pa ini kag ginbuksan ang iya tyan kag sang masapwan naga gwa na ang internal organs sini kag wala na sang kabuhi.

Gilayon naman nga nagpatigayon sang Hot Pursuit Operation ang mga otoridad sa pagpanguna ni Police Chief Inspector Ramil Villagracia hepe sang Tboli PNP kun sa diin nabaatan suno pa sa suba ang 3 sa lima ka mga suspek nga nakabrief lang ka nagapaligo nga may marka pa sang dugo ang mga lawas makaligad himuon ang krimen.

Gin-arestar naman ang mga ini samtang ang 2 pa sa mga suspek ang padayon nga ginalagas nga mga ginapatihan nga natam-an sa iligal nga droga.

Sa karun nagapadayon pa ang imbestigasyon sang T’boli PNP sa nasambit nga krimen samtang hustisya naman ang ginasinggitan sang pamilya sang biktima.