KORONADAL CITY – Luyag sang talatapan sang Overseas Workers Welfare Administration (OWWA) nga maamyendahan ang pila sa mga polisa angot sa proteksyon nga ginatanyag sa mga kabulig sang diplomatic corps nga nagaobra sa iban nga pungsod.

Ini ang ginpahayag ni OWWA Administrator Hans Leo Cacdac sa eksklusibo nga interbyu sang Bombo Radyo Koronadal makaligad gin-istoryahan ang video sang pagpangmaltrato ni Philippine Ambassador to Brazil Marichu Mauro sa 51 anyos nga kabulig sini nga si alyas Nida nga tumandok sang probinsya sang South Cotabato.

Suno kay Cacdac, luyag niya nga paamyendahan ang polisa nga dapat ipaidalom sa proseso sang Philippine Overseas Employment Association (POEA) kag sa OWWA agud mahatagan ang mga ini sang proteksyon.

Ini bangud natukiban sang ila talatapan nga nga wala sa ila nga database ang kabulig nga ginmaltrato ni Mauro, kun sa diin nakapauli na sa subong ang nasambit nga kabulig samtang ginapapaathag naman ang opisyal sa iya ginhimo nga pagpanakit makaligad ini nga ginpapauli sa Pilipinas.

Sa ulihi, ginatugyan na niya sa kamot sang Department of Foreign Affairs (DFA) ang imbestigasyon kag ang kapalaran sang nasambit nga opisyal samtang nagpromisa ang ila talatapan nga magabulig man sila sa pamilya sang nasambit nga kabulig.