KORONADAL CITY – Natalana nga pasidunggan sang Western Mindanao Command ang lima ka mga suldado nga napilasan sa magkatuhay nga mga engkwentro sa Patikul, Sulu nga ginkapatay naman sang tatlo ka miyembro sang Abu Sayyaf Group.

Ini ang ginpahayag ni Wesmincom spokesperson Major Arvin Encinas sa eksklusibo nga interbyu sang Bombo Radyo Koronadal.

Suno kay Major Encinas, nagakaangay nga pasidunggan ang nasambit nga mga suldado nga kabahin sang 21st Infantry Battalion sang Philippine Army bangud sa ila kaisog nga ginpakita sang nakaengkwentro ang terror group sa bahin sang Sitio Tubig Paliya, Barangay Danag.

Suno kay Encinas, pagahatagan man sang pasidungog ang mga ini bangud sa maisog nga pag-atubang sa duha ka risgo nga ginalakipan ang isyu sa seguridad kag ang pamahog sang covid-19.

Samtang nagapadayon man ang pagtumod nila sa grupo nga responsable sa nagluntad nga engkwentro.

Kun madumdoman nga nagabutang sang blockade ang mga tropa sang 21st IB sang nakaengkwentro nila ang mga armado nga bandido antes nagpalagyo sa encounter site ang terror group.

Makaligad naman ang isa ka oras, ila man nga nakaatubang ang grupo sang mga suldado halin sa kasubong nga batalyon.

Nagdugay sang isa ka oras ang ikaduha nga engkwentro kun sa diin tatlo sa mga terorista ang napatay apang isa ka bangkay lamang ang narekober sa site.