KORONADAL CITY- Ginpaidalom na sa kustodiya sang Philippine Drug Enforcement Agency-ARMM ang 4 ka persona nga naarestar sang mga otoridad sa ginpatigayon nga anti-illegal drugs operation sa syudad sang Cotabato.

Sa impormasyon sang PDEA-ARMM bigtime suppliers ang ila nga natikma sa entrapment operations kun sa diin kalakip sa mga naarestar amuh sanday Alma Akmad, Basir Tantong kag ang asawa sini nga si Vilma kag isa ka Mhads Luminog Mamintal nga natikma sa akto nga nagabaligya sang shabu nga may balor nga P10 million pesos.

Luwas pa sa P10 million nga balor sang shabu, narekober man sang mga otoridad ang P1.7 milyon nga balor sang shabu sa posisyon nanday Akmad kag Tantong.

Kaangot sini, suno kay PNP 12 spoksperson PSupt. Aldrin Gonzales, ang mga nadakpan amuh ang mga notoryus nga drug traffickers sa central Mindanao nga nagsusuplay sang iligal nga droga sa Maguindanao, North Cotabato kag pila ka bahin pa sang rehiyon kun sa diin ginpasakaan na ang mga ini sang kaso nga paglapas sa RA 9165 o Comprehensive Dangerous Drugs Act of 2002.