KORONADAL CITY – Nagapadayon ang imbestigasyon sang kapulisan sa pagpang-ambush sa 3 ka mga pulis sa national highway kabahin sang Purok 15-B, Barangay Polonuling, Tupi South Cotabato nga nagresulta sa pagkapatay sang isa kag pagkapilas naman sang duha ka iban pa.

Sa interbyu sang Bombo Radyo Koronadal kay Police Capt. Junel Rey Gatera, hepe sang Tupi PNP, ginkilala sini ang napatay nga si PSSG Reynante Espero samtang pilason naman ang mga kaupdanan sini nga sanday PSSG Jorex B. Velasco kag PSSG Rey Jerome Silvederio nga lunsay naka-assign sa holding unit sang PNP bangud sa mga ginapangatubang nga kaso nga administratibo.

Suno kay Gatera, nagikan ang mga pulis sa siyudad sang Koronadal padulong kuntani sa Regional Command sang PNP sa siyudad sang Heneral Santos sakay sang isa ka unit sang Toyota vios sang gin-ambush ang mga ini sang mga wala pa nakilala nga mga suspek usar ang M16 armalite rifle nga sakay naman sang isa ka unit sang Toyota Fortuner.

Sa subong yara na sa luwas nga kondisyon na ang duha ka pilason nga pulis.

Nakuha sa crime scene ang 35 empty shells sang M16 armalite rifle.

Ginahibalo naman sang kapulisan kun ano ang motibo sa pagpang-ambush kag ang posibilidad nga mga persona nga may kahimuan sang krimen.