KORONADAL CITY — Hugot nga ginkondenar sang South Cotabato PNP ang nagluntad nga pagpang-ambush sa duha ka kapulisan sa Barangay Koronadal Proper sa banwa sang Polomolok nga ginkapatay sang mga biktima.

Sa interbyu sang Bombo Radyo Koronadal kay Police Col. Jemuel Siason, provincial director sang South Cotabato PNP, ginkilala sini ang mga biktima nga sanday PCpl. Witzel Russ Bitantos kag Patrol Man Bryan Costello.

Gindangat pa sa Howard Hubbard Memorial Hospital ang mga biktima apang wala nakaabot nga buhi.

Suno kay Siason, nagapatigayon sang pagpatrolya ang duha ka pulis kag pauli na sang gin-ambush sang yara sa pito ka armado nga mga kalalakihan.

Dako ang pagpati sang opisyal nga ginplano ang pag-atake sa duha ka pulis.

Dugang ni Siason nga may lead na sila kag natumod na ang mga suspek samtang nagapadayon ang hot-pursuit operation sa insidente.

Nakuha sa crime scene ang nagkalain-lain nga empty shell sang wala pa nakilal-an nga sahi sang armas luthang.

Ginapatihan nga motibo sa krimen amo ang serye sang operasyon sang mga kapulisan sa lugar.

Naka-half mast naman ang hayahay sang Polomolok PNP bilang pagkilala sa napatay nga mga kaupdanan.