Nagsungka sa militar ang duha ka opisyal kag apat ka katapo sang Guerilla Front Musa sang Far South Mindanao Region sang New People’s Army nga nagapatigayon sang operasyon sa probinsya sang South Cotabato kag Sultan Kudarat.

Ini ang ginkumpirmar ni Lt. General Corleto Vinluan, Jr. commander sang Western Mindanao Command.

Ginkilala ni Vinluan ang mga nagsungka nga sanday Tener Mantang Maquil, alyas Buyo-Buyo, isa ka supply officer; Anamie Maquil Bal-ot, alyas Lyn-Lyn, isa ka medic;kag apat nga mga kaupdanan nila nga sanday Allan Mistibo Samblang, alyas Caesar; Tyron Asom Saligan; Timbangan Ganang Maquil, alyas Kilohan kag Mike Ganang Maquil, alyas Arnold nga lunsay mga residente sang Barangay Ned, Lake Sebu, South Cotabato.

Suno kay Vinluan, boluntaryo nga nagsungka ang mga ini sa 37th Infantry Batallion, Philippine Army sa Barangay Tibpuan, Lebak, Sultan Kudarat.

Kalakip sa mga ginsungka sang mga ini ang 7.62mm M14 rifle, duha ka 9mm sub-machine guns kag duha man ka kalibre 357 revolvers..//Gilayon naman nga ginpaidalom sa custodial debriefing ang mga nagsungka nga rebelde.

Sa subong, naglab-ot na sa 75 ang nagbalik sa sabak sang gobyerno umpisa sadtong una nga adlaw sa bulang sang Enero, 2021.