KORONADAL CITY – Nagapadyon sa karon ang imbestigasyon sang kapulisan sa banwa sang Mlang North Cotabato may kaangtanan sa ginapatihan nga mga biktima sang summary execution nga nasapwan sa national highway sakop sang Purok 1, Barangay Nueva Vida.

Sa interbyu sang Bombo Radyo Koronadal kay PLt. Col. Realan Mamon, hepe sang Mlang PNP, ginkilala ang mga biktima kanday Mactar Isma Maulana, 25 anyos, mekaniko kag isa ka menor de edad nga si alyas William, nga residente sang Brgy. Kilagasan, Kabacan, North Cotabato.

Suno kay Mamon, nakaangkon sang madamo nga buno ang mga biktima kun diin yara sa 35 ka pilas ang naangkon ni Maulana samtang 20 naman ka buno ang naangkon ni alyas William.

Magluwas sini nakagapos pa ang kamot kag tiil sang duha ka biktima kag naputo sang packing tape ang ila nga mga ulo.

Possible suno pa ginhaboy lamang sang mga suspek ang nasambit nga mga biktima sa lugar.

Sa subong nakig-angot na sila sa mga kaiping nga Police Stations agod sa maid-id nga imbestigasyon agud makilala ang mga suspek kag mahibaluan ang motibo sang krimen.