KORONADAL CITY – Nadugangan pa ang napatay nga empleyado sang City Hall sang Koronadal bangud sa Covid-19.

Ini ang ginkumpirmar ni Dr. Edito Vego, OIC City Health Officer sa eksklusibo nga interbyu sang Bombo Radyo Koronadal.

Suno kay Vego, isa ka empleyado sang City Agriculturist Office ang napatay bangud  sa pag-angkon sang makalalaton nga balatian tuga sang corona virus magluwas sa una nga napagkit sa City Treasurer’s Office.

Apang, ginpaathag ni Vego nga indi kalakip ang napatay sa ulihi nga 17 ka mga nagpositibo sa COVID-19 sa City Hall.

Madumduman nga ginpatuman ang skeletal workforce sa City Hall sang Koronadal bangud sa kadamuon sang ginakabalak-an nga malatnan sat ion nga indi pagbuhinan ang mga  empleyado sa tagsa ka mga departamento.

Kadunga sini, ginpasiguro man sang opisyal nga indi maapektuhan ang serbisyo nga igahatag sang City Hall para sa mga transaksyon sa kada adlaw kag indi man pag-isirado ang City Hall para sa mga importante nga transaksyon.