KORONADAL CITY – Apektado sa subong sang landslide, flash flood kag mga tension cracks ang duha ka banwa sa probinsya sang South Cotabato tuga sang wala untat nga pagbubo sang ulan bangud sa Low Pressure Area kag Intertropical Convergence Zone (ITCZ).

Sa interbyu sang Bombo Radyo Koronadal kay Tboli Mayor Dibu Tuan, pabudlayan sa subong ang pagnaog halin sa mga barangay sa ila banwa sang mga residente kag produkto sang mga ini bangud sa mga naguba nga dalanon tuga sang flash flood kag landslide.

Suno kay Mayor Tuan, tubtub padayon ang pagbubo sang ulan ang mabudlayan sila ang kay-uhon ang ang mga naguba nga dalanon rason nga galaum ini sang paghangop sang publiko.

Samtang, ginkumpirmar naman ni Mayor Floro Gandam nga may mga landslide nga nagluntad sa ila nga mga barangay sa ila nga banwa bangud man sa landslide kag flash flood.

Sa kamatood may nahulog suno pa nga Ten Wheeler truck sa pil-as bangud sa naguba nga dalanon kag may mga residente nga ginbalhin bangud sa nakit-an nga mga tension cracks sa Sitio Kibang.

Kaangot sini, nagapanawagan ang mga alkalde sang nasambit nga mga banwa sa mga residente sa ila nga lugar nga mangin vigilante kag alerto subong nga masami ang pagbubo sang ulan.