KORONADAL CITY – Yara na sa kustodiya sang mga otoridad ang duha ka suspek sa ginpatigayon nga drug buy-bust operation sa siyudad sang Koronadal, lakip na diri ang isa ka menor de edad antes mag-bag-ong tuig.

Ginpatigayon ang nasambit nga operasyon sa bahin sang Public Cemetery sa Brgy. Zone 4, Koronadal City kun sa diin ginkilala ang mga suspek nga si alyas Julius, 17 anyos kag Medel Bustamante, 19 anyos nga lunsay mga residente sang Prk. Mahigugmaon sa nasambit nga barangay.

Nakuha sa ila posesyon ang 16 ka medium sized nga sachet sang ginapatihan nga shabu nga ginabulobanta nga nagabalor sa masobra P16,000 kag ang P500 nga marked money.

Kaso nga pagbayolar sa RA 9165 ukon Comprehensive Dangerous Drugs Act ang ginapangatubang ni Bustamante samtang ginturn-over naman sa DSWD ang menor de edad para sa counseling.