KORONADAL CITY –
Naglab-ot na sa halos 100 ang mga nadakpan sang mga otoridad nga naglapas sa ginapatuman nga curfew hour sang Tacurong City PNP kag Joint Task Force Talakudong sa bug-os nga siyudad kag kabanwahan sa probinsiya sang Sultan Kudarat.

Ini ang ginpahayag ni PSSUPT Raul Supiter , provincial director sang Sultan Kudarat sa interbyu sang Bombo Radyo Koronadal.

Suno kay Supiter, sa nasambit nga numero masobra 80 ang nadakpan sa Tacurong City kag ang iban naman sa mga bayan sa Sultan Kudarat.

Dugang pa ni Supiter nga mas ginpahugtan pa nila ang pagpatuman sang curfew hour kag wala sila sang ginapalampas apisar nga kakilala pa ukon sin-uman nga personalidad.

Isa sa mga nadakpan nga naglapas sa curfew amo ang isa ka manunudlo sa pampubliko nga buluthuan gikan sa banwa sang Buluan Maguindanao kag mga empleyado sang gobyerno.

Kaangot sini nagpanawagan si Supiter sa mga pumuluyo nga sundon ang ginapatuman nga curfew kag magdala man sang ID agud nga indi masita kag masulod sa lock up cell.

Ang ginapatuman nga curfew hour sa Sultan Kudarat ang nagasugod humalin alas 10:00 sang gab-i tubtob alas- 4:00 sang kaagahon base sa deklarasyon sang Martial Law sa bug-os nga isla sang Mindanao.