KORONADAL CITY- Nagapadayon ang imbestigasyon sang mga otoridad sa nagluntad nga pagpangluthang sa banwa sang Polomolok South Cotabato nga nagresulta sa kamatayon sang isa ka persona kag pagkapilas sang 2 ka iban pa.

Ginkilala ang napatay nga si Noby Alvarez Suela, 37 anyos may asawa kag residente sang Prk. Pag-asa Brgy. Cannery Site sang nasambit nga banwa samtang pilason naman sanday Jeffrey Tumiklang, 23 kag Jane Tayawon Casinto, 14 lunsay mga residente sang Prk 4 Laguang.

Suno sa Polomolok PNP yara sa isa ka tindahan si Suela agud tani ihatag ang sweldo sang iya kaupdanan sa trabaho kag sang pahalin na ini sakay sang iya motorsiklo san gulpi nga nag-abot ang isa ka suspek nga nakatabon ang nawong.

Tatlo ka bes nga ginluthang sang suspek si Suela sa ulo kag dali nga ginkuga ang sling bag sini kag gilayon nga nagpalagyo sa crime scene.

Naulamid kag naigo sang bala ang 2 pa ka biktima nga yara sa atubang man sang nasambit nga sari-sari store.

Nahibaluan nga yara sa P30,000 ang unod sang sling bag sang biktima nga pangsweldo kun tani sa iya nga mga katrabaho.

Sa Karun ginahibalo pa ang mga identity sang mga suspek.