KALIBO, Aklan—Nakalista eon it 11 nga kaso it omicron variant it covid-19 ro United Kingdom.

Sa nasambit nga numero, an-om ro maghalin sa Scotland ag lima ro sa England.

Bangud kara, ginpahayag ni Bombo International Correspondent Geoffrey Hutchinson it London, United Kingdom nga ro mga travelers nga halin sa infected countries ukon ro mga nabutang sa red list hay inde eon makasueod sa UK.

-- ADVERTISEMENT --

Samtang, ro mga British citizen hay kinahang-ean nga magpaidaeom sa napueong adlaw nga isolation ag magpatigayon it covid-19 testing.

Ko buean it Hulyo suno kana hay bukon eon it mandatory ro pagsuksok it face mask apang bangud sa pagsueod it bag-ong variant it deadly virus hay uman sanda nga magasuksok kara partikular kon magasakay sa mga public transport ag magsueod sa mga shops.

Mag-eowas kara, maga-imponer it penalty ro andang gobyerno sa mga madakpan nga uwa nagasuksok it face mask ag uwa naga-isolate kon may mabatyagan nga sintomas it covid-19.

Sa pihak nga parte, required eon man sa mga pumueoyo ro pagpatigayon it booster shot sa sueod it tatlong buean halin sa pagiging fully vaccinated it mga raya.

Ginpahayag dugang ni Hutchinson nga maabo gihapon ro uwa nabakunahan bangud sa nagkaeain-eain nga opinyon it mga raya.

Apang makaron sigon hay hugot raya nga igaimplementar it gobyerno bilang pangaman eon man sa panibag-ong variant it pandemya.