KALIBO, Aklan—Gin-aresto  it  mga awtoridad sa gina-istaran nga hotel ro sangka turista nga ginasugid nga positibo sa Coronavirus Disease 2019 (COVID-19).

-- Advertising --

Suno kay Provincial Administrator Atty. Selwyn Ibarreta,  nakabaton sanda it impormasyon halin sa Department of Health (DoH) Region VI  angot sa gin-obra nga contact tracing it DOH Epidemiology Bureau angot sa sangka COVID positive nga nakaeusot eon sa isla.

Suno kana nga ko Enero 14 hay nagpaidaeum  sa  RT-PCR test ro eaeaki halin sa Malabon City ag nagguwa sa resulta nga positibo imaw.

Apang, ko Enero 16,  uman nga  nagpa-swab test sa ibang molecular laboratory ro turista ag dikara hay negatibo ro anang resulta.

Bangud kara,  nakabo-oe imaw it  QR code ag nakasueod sa Boracay ko Enero 17 kaibahan ro nobya.

Presenteng naka-isolate ro daywa sa quarantine facility sa Aklan Training Center.

Dugang pa ni Atty. Ibarreta nga puro  nag-negatibo ro magkarelasyon sa RT-PCR tests nga gin-obra kanda kamana man sa mga  staff it hotel nga andang gintiniran.