KALIBO, Aklan—Ginpamalibaran it sangka overseas Filipino worker ukon OFW sa South Africa ro mga nagguwang balita ag temprano pa para hambaeon nga mas malala ag delikado ro bag-ong variant it coronavirus disease ukon covid-19 partikular ro ginatawag nga Omicron variant kumpara sa delta variant bangud nga hasta sa makaron hay uwa pa it napabalita nga may pasyenteng una sa kritikal nga kondisyon ukon may mga namatay eon.

Suno kay Bombo International Correspondent Chris Goosen it Cape Town, South Africa nga uwa pa it solidong basehan nga idto mismo naghalin ro variant kundi sa nasambit nga nasyon eamang nadiskubre ag nadetect it mga eksperto ro bag-ong variant it deadly virus kundi.

Ginpahayag dugang ni Goosen nga magapabilin sa alert level 1 ro nasyon kon sa siin haeos tanan nga negosyo hay nakabukas eon, 100 porsyento ro seating capacity sa public transportation, 75 porsyento ro social gatherings ag may paghaeoga sa mga hueag it pumueoyo sandig man sa ginpatigayon nga state of nation address ni South African President Cyril Ramaphosa.

-- ADVERTISEMENT --

Apang, kanselado eon ro tanan nga international flights paguwa-sueod it nasyon rason nga maabong mga byahero ag turista ro stranded makaron sa tanan nga paeoparan.

Mag-eowas kara, hugot man sigon ro pag-engganyo it presidente sa mga pumueoyo nga magpabakuna eon kontra sa deadly virus bangud nga ginapatihan nga ro tinamaan it omicron variant hay bakunado rason nga bukon it naging malala ro epekto kara sa pasyente.

Samtang sa pihak nga parte, apisar nga temprano pa para hambaeon nga magaresulta raya it hard lockdown, ginakonsidera eon it gobyerno ro nasambit nga tikang bangud nga ro South African health authorities ag virologist nga eksperto sa pagdetect it mga virus hay uwa sigon sanda naga-untat sa andang mga research hasta nga mapatud-an ro mga ginhalinan kara.