KALIBO, Aklan—Nagapabilin nga matawhay ro sitwasyon sa bahin it Roman Catholic Cemetery ag Medalla Milagrosa Cemetery sa banwa it Kalibo sa tunga it nagahilapit nga selebrasyon it piyesta minatay.

Suno kay Norberto Clarite, security it daywang nasambit nga sementeryo nga amat-amat eon nga naga-adto ro pilang pumueoyo para maglimpyo ag magdu-aw sa pantyon it andang mahae sa kabuhi nga nagtaliwan eon.

Gin-engganyo man kara ro publiko nga maging responsable sa pagtipon ag pagpilak it andang mga basura.

Samtang, hugut sigon nga ginabawae ro pagdaea it mga mataeom nga bagay sa sueod it bisinidad it sementeryo mag-eowas eon lang sa pala ukon sanduko nga ginagamit it kaeabanan sa paglimpyo partikular sa pagtuoe it mga sanga it kahoy.

Angot kara, may naka-install eon nga waeong ka mga Closed-circuit television (CCTV) sa bahin it Medalla Milagrosa Cemetery ag nakataeana man nga butangan it ap-at nga camera ro Roman Catholic Cemtery sa masunod nga mga inadlaw.

-- ADVERTISEMENT --

Tuyo kara nga ma-monitor ro hueag it mga pumueoyo kamana man nga malikawan ro anumang kinagamo.

Nasayuran nga nagpagguwa eon it Executive Order si Kalibo Mayor Emerson Lachica angot sa temporaryong pagpasarado it mga sementeryo sa banwa it Kalibo umpisa Oktobre 29 hasta Noyembre 2, 2021.

Boses ni Norberto Clarite