KALIBO, Aklan—Ginpaidaeom sa pitong adlaw nga granular lockdown ro Sitio Eambon nga sakop it Brgy. Calangcang sa banwa it Makato.

Raya hay matapos nga makalista it limang aktibo nga kaso it Coronavirus Disease 2019 ukon COVID-19 ro nasambit nga lugar.

-- Advertising --

Suno kay Punong Barangay Niel Tumbukon nga nagpatawag imaw emergency meeting sa andang barangay para maistoryahan ro pagahimuon nga tikang.

Kun sa siin, nakasugtanan nanda nga ipaidaeom ro Sitio Eambon sa sang dominggo nga granular lockdown umpisa alas-12 it udtro adlaw Abril 13 hasta Abril 20.

Ro una sigon nanda kaso hay sangka babaye nga miyembro it youth organization sa andang barangay.

Ginasugid nga nag-adto raya sa siyudad it Iloilo ko Abril 6 para magpirma it kontrata sa anang gin-aplayan nga BPO company.

Kat ginpaidaeom sigon raya sa rapid test hay natukiban nga positibo imaw sa deadly virus.

Abril 7 kat ginsueang imaw it MDRRMO-Makato sa Iloilo ag gindiretso sa COVID Center it banwa kamana man nga insigidang gin-isolate ro miyembro it pamilya ag mga nakasalumaha it pasyente.

Dugang pa ni Kapitan nga ko Abril 8 hay ginpaidaeom sa RT-PCR test ro babaye kun siin nagguwa nga positibo imaw sa virus.

Ko Abril 10 suno kana ginbue-an it swab test ro mga high risk contact it pasyente ag pagka-gabi-i nagguwa ro resulta it tatlo nga nagpostibo samtang ko Abril 11 hay nadugangan pa raya it sambilog.

Angot kara, ginpasiguro man it opisyal nga pagatinguhaan nandang mataw-an it ayuda ro mga apektadong residente.

Nasayuran nga kapin sa 17 ka mga household ro apektado it ginpatuman nga granular lockdown.

Sa makaron hay may 11 pa sandang ginahueat nga resulta it swab test.

Boses ni Punong barangay Niel Tumbukon