KALIBO, Aklan—Owa it sin-o man nga nakasayod sa mga posibleng matabo sa paeaabuton.

Raya ro pagklaro ni Fr. Tudd Belandres it Saint John the Baptist Cathedral Church may kaangtanan sa  nagakalhit makarun sa social media angot sa  prediksiyon it psychic nga si Rudy Baldwin.

Madumduman nga base sa prediksiyon it nasambitan nga psychic nga anang ginpost sa anang facebook  page ko nagtaliwan  nga mga binuean hay makangkon it maeapnagon nga pagbaha sa probinsya it Aklan apisar nga owa man it bagyo.

Raya man sigon hay magatao it grabe nga kahalitan sa mga pomoeuyo.

Nasayuran nga ko nagtaliwan nga Sabado hay haeos owa it untat  ro pagbubo it mabaskog nga uean tuga it Low Pressure Area ukon LPA kun sa siin maabong mga saeakyan ag motorsiklo pa ro napatyan it makina sa tunga it nagabaha nga karsada.

-- ADVERTISEMENT --

Bangud kara, maabo man ro nagshare sa ginpost ni Baldwin  sa pagpati nga naging matood ro  prediksiyon.

Apang sa bahin man it SimbahangKatolika hay owa raya it kamatuoran bangud owa it may nakasayod sa nga puwedeng matabo sa kalibutan.

Ro paguean-uean man  suno pa kay Fr. Belandres hay makabig nga grasya.

Gin-engganyo pa kara ro mga tumoeo-o nga padayun nga magpangamuyo para sa kaeuwasan mas kapin eun sa oras it mga  kalamidad.

Boses ni Fr. Tudd Belandres