KALIBO, Aklan—Kabilugan nga naging matawhay ro selebrasyon it Kalibo Sr. Sto. Niño Ati-atihan Festival 2021.

Raya hay sa pihak it pagbuhos it mga deboto sa St. John the Baptist Cathedral kaina it agahon para magtambong it Pilgrims Mass.

-- Advertising --

Suno kay Police Major Belshazzar Villanoche, hepe it Kalibo Police Station, alas-4 it aga-ag pa sigon nag-umpisa ro andang pagdeploy sa mga kapulisan agud nga ma-cover ro unang misa sa Cathedral.

May mga gindeploy sigon sanda para sa traffic management, COVID Martial ag venue patrollers para magtao it seguridad sa mga deboto.

Haeos nasunod man sigon it mga church goers ro minimum health protocols partikular ro physical distancing.

Raya hay matapos nga magbutang ro mga kapulisan it markings sa bahin it Archbishop Street ag sueod it Kalibo Pastrana Park.

Raya hay para mataw-an it kahigayunan ro mga pumueoyo nga makatambong it misa engkaso nga mapuno eon ro simbahan.

Samtang, pag-abot sigon it hapon hasta it gabi-i hay naging manageable eon man ro mga tawo bangud nagsangkiri eon lang ro nagpadueong sa simbahan.

Owa man sigon sanda it nailistang krimen angot sa selebrasyon maeuwas eon lang sa andang ginrespondehan nga pilang indibidwal matapos nga madueaan it alintro ag nag-eain ro pamatyag.

Aminado man ro opisyal nga mabahoe ro kinaeain it selebrasyon makaron kumpara ko nagtaliwan nga mga dinag-on tuga it pademya.

Nasayuran nga owa anay ginpasugtan it mga natungdan ro pagsadsad ukon street dacing ag pagperfrom it nagkaeain-eain nga mga tribu agud malikawan ro pagkalhit it COVID-19.

Ro ginpasugtan eamang hay misa ukon religious activities.

Boses ni Police Major Belshazzar Villanoche