KALIBO, Aklan—Mas pang ginhugtan ro seguridad sa Washington DC sang adlaw antes ro inagurasyon ni Joe Biden bilang ika-46 nga presidente it estados unidos nga maga-simbolo man it pag-umpisa it anang ap-at nga dag-on nga termino ag ni Kamala Harris bilang bise presidente.
Suno kay Bombo International Correspondent Cha Reyes it Virginia, USA nga ro tikang hay sa atubang it mga paeag it extremist supporters ni outgoing president Donald Trump, matapos ro gin-obra nanda nga pag-atake sa US Capitol ko nagtaliwan nga domingo.
Naghinyu man sigon ro mga otoridad sa publiko nga indi eon maghana pa nga magtambong sa seremonya ag magtan-aw eon lang sa andang mga telebesyon agud nga malikawan ro tsansa it pag-angkon it kinagamo ag indi magaresulta ro event bilang sangka COVID-19 superspreader.
Limitado ag puro VIP eamang ro magiging audience sa nasambit nga inauguration tuga man it pandemic.
Magiging virtual ro traditional nga quadrennial ball pagkatapos it inauguration, apang magiging star-studded gihapon raya.
Mag-eowas nga ginpalibutan it kurae ro washington DC, nagkalhit man ro kapin sa 25,000 nga mga national guards.
Sarado eon ro National Mall sa publiko.
Ginbarikadahan eon man ro mga nagapangunang karsada ag tulay.
Pwede eamang nga makasueod sa security checkpoints ring nga ginatawag nga red zone ag mga extensions nga green zone ro mga otoridad.
Bawae kara ro mga residente ag lokal nga mga negosyante.
