Kalibo Aklan ——–Patay ro sangka motorista kaibahan ro anang backrider matapos nga maimbolbar sa aksidente nga nag-eontad sa national highway nga sakop it Brgy. Buenasuerte, Nabas.

Ginkilaea it Nabas PNP ro driver nga si Jomar Igot samtang ro anang backrider hay si Sally Montel, parehong sa legal nga edad ag mga residente it Brgy. Union, Nabas.

-- Advertising --

Base sa imbestigasyon it pulisya, nagasunod ro mga raya sa motorsiklo nga ginamaneho ni Agosto Villagracia, 39 anyos it Brgy. Ondoy, angkas sanday Danielyn Maquirang, 38-anyos it Brgy. Poblacion ag Ryan Lorente, 33-anyos it Brgy. Aslum, Ibajay.

May kaangtanan kara, ro daywang ka motorsiklo hay maghalin sa direksyon it Caticlan paadto sa banwa it Ibajay kat pag-abot sa nasambit nga lugar hay nasub-eang it mga raya ro wing van nga ginamaneho ni Joel Maravilla, sa legal nga edad, residente it Sagay City, Negros Occidental kaibahan ro anang pahinante nga si Winlovely Lemoncitie, sa legal nga edad ag residente it Pilar, Capiz.

Ginapahayag nga nag-overshoot ukon eumapaw ro wing van sa direksyon it mga motorisklo kon sa siin nakalikaw kara ro unang behikulo apang uwa eon nalikawan ro pangaywang motorsiklo sakay ro daywang ka mga biktima.

Head on collision sigon ro natabo nga gintunaan it pag-angkon it fatal nga lastro sa eawas it daywa nga nagresulta sa andang hinali nga kamatayon.

Nadaea pa sa Ibajay district hospital ro daywa apang gindeklara man nga dead on arrival it nagtatap nga doktor.

Samtang, ro driver it unang behikulo kamana man ro driver it wing van hay presenteng nakaconfine sa Aklan Provincial Hospital matapos nga makaangkon it gasgas ag lastro sa kaeawasan.

Ro daywa nga iba pang backrider hay gin-eapatan man it medikasyon sa Ibajay District Hospital.