KALIBO, Aklan—Sangka 29-anyos nga ginang ro nagdangop sa Bombo Radyo Kalibo para magpangayo it bulig kon paalin nga  mabawi ro anang tatlong menor de edad nga unga nga sa kustodiya makaron it andang ama sa Bagacay, Albay sa Bicol.

Suno kay Marilyn Nicolas it Brgy. Linayasan, Altavas nga ko 2015 hay nagdesisyon imaw nga makipagbueag sa anang dating live-in partner nga si  Joseph Balbalosa bangud sa pisikal  ag verbal nga pag-abuso kana.

-- Advertising --

Nag-uli sigon sanda sa aklan kaiban ro anang tatlong unga nga kato hay nagapang-edaron pa eamang it daywa, tatlo ag ap-at nga dag-on.

Apang ko  2016 hay nag-apas ro anang dating live-in partner ag ginhueam ro anang mga unga  agud nga maging abay sa kasae it anang igmanghud sa Bicol.

Pagkatapos  kara hay owa eon ginbalik it dating karelasyon ro andang unga.

Pilang beses man sigon imaw nga naghinyu sa ibang igmanghud ni Joseph nga maka-istorya ro anang mga unga pinaagi sa video call,  apang ginbalewala ro anang hinyu.

Ginarason sigon it mga raya nga owa eon imaw it kinamatarung sa mga unga bangud nga owa man imaw nakatau it sustento.

Gindugang pa ni Marilyn nga ginhana man nana kato nga mabawi ro anang mga unga, apang ginapaeag imaw nga may maeain nga matabu kana kon mag-agto sa Bicol.

Nasayuran nga sa edad nga 17 hay napilitan sigon si Marilyn nga makipag-live-in kay joseph matapos nga magkatueog raya sa boarding house  it  eaeaki nga ginkaakig it anang magueang nga babaye.

Raya hay maskin nga gina-insister nana nga owa kanda it natabu ko rato nga paniempo.

Ro daywa hay nagkakilaea sa Metro Manila ag nag-umpisa ro andang romantikong relasyon sa pagiging mag-textmate.

Sa makaron hay presente imaw nga may live-in partner nga taga-Brgy. Polo, New Washington.

Boses ni Marilyn Nicolas