KALIBO, Aklan—Masobra sa an-om nga igo it pag-eabo ro naangkon it sangka eaeaki matapos nga gin-eabo it owa pa makilaeang suspek bandang alas-11 ko Dominggo it gabi-i sa Brgy. Manika, Libacao.

-- Advertising --

Nakilaea ro biktima nga si Melvin Asiong, residente it Brgy. Loctuga sa nasambit nga banwa.

Suno kay Police Major Jose Marlon Murallo, hepe it Libacao Police Station, nag-adto sa sangka namatyan sa nasambit nga lugar ro biktima kung siin nakipag-inuman raya sa kaiping nga baeay.

Apang, kat nag-ihi sigon raya sa guwa hay gulpi eamang imaw nga gin-eabo it owa pa makilaeang persona.

Ginpahayag nga napan-uhan man sigon it kainuman it biktima nga may nagakatabo nga kumosyon sa guwa apang kat makita kara ro hinangiban nga gingamit it suspek hay owa eon raya nagka-interes nga magguwa bangud sa kahadlok nga madaeahig.

Base sa pag-imbestiga it pulisya, owa man sigon it nakaaway ro biktima ag ginasugid nga sangka mabuot man raya nga tawo kamana man nga owa raya it bitbit nga armas kat matabo ro insidente.

Sa makaron hay nagapadayun pa ro imbestigasyon it Libacao PNP angot sa hitabu.