KALIBO, Aklan—Nagpatigayun it sangka dayalogo ro mga opisyal it barangay Badjo, Numancia kaibahan ro mga petitioner ag iba pang natungdan nga ahensya it gobyerno para talakayon ro may kaangtanan sa igapatindog nga crematorium facility sa bahin it Badjo Municipal Cemetery.

Suno kay Punong barangay Victor Crispino it nasambit nga lugar nga nag-request sanda sa lokal nga gobyerno nga makaangkon it dayalogo ukon information dissemination para maipaathag ro sentimiyento it kada isaea sa ginaduso nga proyekto.

Aminado si kapitan nga naging mabudlay kahapon ro sitwasyon ag naging mahaba ro pagbaeayluhan it mga pangutana.

Sa oras sigon nga makompleto it proponent ro mga ginakinahang-ean nga permit halin sa Department of Environment and Natural Resources (DENR) ag Department of Health (DOH) hay pwede nandang padayunon ro konstruksyon it crematorium.

Apang, sa bahin man it mga petitioner haum sigon sanda nga ipadayun ro andang apela maskin nga makompleto pa it pasilidad ro mga ginakinahang-ean nga dokumento para sa proyekto ag posible pang umabot raya sa korte.

-- ADVERTISEMENT --
Boses ni Punong barangay Victor Crispino