KALIBO, Aklan—Arestado sa ginkasa nga Oplan TKAL (Tokhang Kontra Armas Luthang) nga ginpatigayon it gintingob-pwersa it Aklan First Mobile Force Company, Aklan Police Provincial Office (APPO), Banga PNP, ag Regional Intelligence Unit (RIU) ro sangka eaeaki bangud sa illegal nga paghupot it baril.

-- Advertising --

Ginkilaea ni  P/Lt.Col. Bernard Ufano  it  Aklan Police Provincial Office ukon APPO ro suspek nga si Rommel Navarra, sangka chainsaw operator ag residente it Sitio Agpalina, Badiangan, Banga.

Narekober sa posisyon it suspek ro sangka .45 calibre it baril,  sambilog nga magazine, daywang ka  live ammunitions it calibre .45 nga baril, sangka  air rifle,  ag sangka  sling bag.

Una kara, nakabatun it report ro mga otoridad  angot sa gina-alegar nga perming pagpaeupok  it baril it suspek sa lugar nga nagakri-ar it nerbyos sa anang mga kaeapit baeay.

Ro suspek hay presenteng una sa kustudiya it Banga PNP para sa nagakaigong disposisyon.