KALIBO, Aklan—Ginkumpirma ni  Army Captain Kim Apitong,  spokesperson it  3rd Infantry Division it Philippine Army  nga sambilog sa mga hapatay nga miyembro it New People’s Army ukon NPA sa sangka engkwentru sa  Miag-ao, Iloilo ko Disyembre 1 hay makabig nga top-ranking NPA terrorists sa bilog nga Panay.

Kaibahan suno kana sa natumod nga napatay hay si Joeven Ceralvo alias Lex, commander  it  NPA’s Komiteng Rehiyon-Panay  Southern Front  ag miyembro man it KR-P executive committee kaibahan ro anang asawa nga si alias Elay.

Mabahoe sigon ro magiging epekto kara sa rebeldeng komunista bangud nga kaabuan sa mga namatay hay mga team leader.

Mabahoe man ro andang pagpati nga mag-eowas sa mga namatay hay maabu nga iba pa sa andang miyembro ro naninahan.

Nasayuran nga gintimbre it pilang mga residente ag sibilyan ro planong pagpatigayon it  pueong  it mga miyembro it  NPA  sa lugar  agud nga pahauman ro grand tactical offensive  ukon  mga pag-atake nga paga-obrahon  sa pilang military detachment  ukon  estasyon it pulisya  agud nga mataw-an it highlight ro nagahilapit nga selebrasyon it  ika-53 nga  founding anniversary it  Communist Party of the Philippines (CPP) sa Disyembre 26.

-- ADVERTISEMENT --

Bangud sa impormasyon naka deploy ro tropa it gobyerno it  bastanteng pwersa sa lugar.

Pila sa mga narekober sa lugar hay ro mga mataas nga kalibre it armas ag  subersibong mga dokumento nga may mataas nga intelligence value.

Gindugang pa ni Apitong nga nagapadayun ro andang operasyon  sa lugar kaibahan ro iba pang units  ag law enforcement agencies.

Boses ni Army Captain Kim Apitong