KALIBO, Aklan—Maswerteng naeowas it pilang mangingisda ro sambilog sa ap-at ka mga persona nga nauna eon nga ginreport sa Philippine Coast Guard (PCG) nga naduea ko adlaw it Sabado, Disyembre 4.

Suno kay Arjo Matorre, residente it Sitio Manggayad, Brgy. Manoc-manoc sa isla it Boracay nga narekober ro baroto nga gingamit it mga missing person kaina it agahon sa Brgy. Cocoro, Magsaysay, Palawan kaibahan si Rolito Casidsid nga nagaeutaw-eutaw sa tunga it eawod.

Apang, sanday Jun Guyo, Juden Martorre ag Mary Jane Matorre hay nagapabilin pa nga missing.

Sa makaron hay indi pa masyadong maka-istorya it mayad si Casisid.

Padayun man ro panawagan it pamilya sa publiko nga insigidang makipag-angot sa mga otoridad engkaso nga may mapan-uhan nga tatlong ka mga persona sa pangpang.

-- ADVERTISEMENT --

Madumduman nga nagbiyahe paadto it Looc, Romblon ro mga missing person bandang alas-7:30 ko Sabado it agahon para makahingabot sa eubong it andang paryente nga namatay.

Apang, pag-abot sigon it hapon hay owa gihapon nakaabot sa lugar ro mga raya rason nga ginpakamayad nandang makipag-coordinate sa PCG. Eubos sigon ro pagkabaeaka it andang pamilya bangud hasta sa makaron hay owa pa makita ro tatlong ka mga persona kamana man nga indi makontak.

Boses ni Mr. Arjo Matorre

Sa pihak nga parte, ginpasiguro man it Philippine Coast Guard (PCG) nga magapadayun ro andang joint search and retrieval operation kabulig ro mga kapulisan para makita ro iba pang missing person.

Suno kay Senior Chief Rufino Abanto it PCG-Palawan nga insigidang gindaea sa barangay si Casidsid para mataw-an it paunang medikasyon ag nakataeana eon nga pagadaehon sa ospital.

Base sa inisyal nanda nga pag-istorya kay Casidsid, nakaangkon sanda it problema sa tunga it andang biyahe tuga it mabaskog nga humbak.

May kaibahan man sigon sanda nga owa eon it kabuhi nga posibleng nahueog sa baroto matapos raya nga makaangkon it kasamaran.

Boses ni Senior Chief Rufino Abanto