KALIBO, Aklan—Mabahoe ro posibilidad nga sa buean it Nobyembre hay pagaboe-on eon ro RT-PCR test requirement sa mga turistang fully vaccinated nga gustong magbakasyon sa isla it Boracay.

Apang ginpahayag ni Aklan Provincial Administrator Atty. Selwyn Ibarreta  nga hay sa kundisyon  nga  kon  matapos eon ro pagbakuna  sa tanan nga mga tourism workers ag residente it isla ag mainland Malay.

Natalakay sigon raya sa ginpatigayon nga  pueong it Boracay Inter-Agency Task Force kahapon.

Nauna eon nga ginpahayag ni Aklan Governor Florencio Miraflores nga nagabueuligan makaron ro gobyerno probinsiyal ag Department of Tourism agud nga matapos ro vaccine roll-out sa isla sa katapusan it buean it Oktubre.


Engkaso nga eubusan nga  mabo-oe ro swab test requirement hay ginaeauman  ro pagbuhos it mga turista sa isla eabi eon  sa nagahilapit nga holiday season nga mabahoe nga bulig sa pagbangon it domestic tourism.

-- ADVERTISEMENT --

Sa nasambit nga pueong, ginpahayag  ni Tourism Secretary Berna Romulo-Puyat,  base sa andang datos, hasta   Oktubre 19,  hay may  91.96% ukon kabilugan  nga  11,779 nga tourism frontline workers sa Boracay ro nabakunahan eon kontra COVID-19.

Mag-eowas kara,  kapin  sa  77.87%  ukon katumbas it 24,451 nga residente ro nabakunahan sa nasambit nga lugar.

Dugang pa kara nga nagapadayun sa makaron ro pag rolyo it bakuna gamit ro nag abot nga kapin sa 35,100 doses it Pfizer vaccine.

Boses ni Aklan Provincial Administrator Atty. Selwyn Ibarreta