KALIBO, Aklan—Pilang dekada eon nga ginaputos it misteryo ro ginakabig nga sangka “haunted house” sa kahabaon it Brgy. Mabilo, Kalibo.

Puno raya it nagkaeain-eain nga istorya ag eksperyensya halin sa mga tawo nga nakapalibot sa lugar ag pilang ka mga motorista eabi eon ro mga naga-agi kada gabi-i.

Sa pag-istorya ni Ramonito Fernandez, residente it nasambit nga lugar nga mabuhay eon nga abandonado ro edipisyo ag maabo eon ro naghana nga mag-istar kara apang owa man nagabuhay.

Posible sigon nga sa tyempo pa it mga hapon kat ginpatindog ro baeay ag bangud sa natabo nga giyera rason nga raya hay nasunog.

Base sa mga naga-eapta nga istorya, may sangka babaye sigon nga miyembro it pamilya it tag-ana it baeay ro namatay sa lugar.

-- ADVERTISEMENT --

Ro ginakabig nga haunted house hay himo sa konkretong materyales ag may una pa nga underground nga posibleng ginagamit kato anay bilang taguan sa tyempo it mga hapon.

Bangud sa kabuhayon eon it staktura, indi man malikawan nga may nabatyagan nga kakaiba ag makapaeanindog it baeahibo nga eksperyensya ro pilang residente.

May mga kahigayunan sigon nga may nababatian sandang limog nga medyo nagatangis halin sa sueod it haunted house kamana man maabo eon ro nadisgrasyang motorista bangud sa gulping nagatabok nga sangka “white lady”.

Dugang pa ni tatay Ramonito nga owa it masyadong naga-eapit sa edipisyo eabi eon kung gabi-i bangud sa kahadlok.

Boses ni Ramonito Fernandez