KALIBO, Aklan—Gintalakay it Sangguniang Panlalawigan it Aklan kahapon sa ginpatigayon nga joint committee hearing ro proposisyon it San Miguel Corporation angot sa ginaproponer nga 300-megawatt (MW) hydro power plant sa Brgy. Nabaoy, Malay.

Suno kay Sangguniang Panlalawigan member Jay Tejada, Chairman it Committee on Environment nga kaibahan sa mga nagtambong sa Zoom meeting ro mga representante it kompanya ag nagkaeain-eain nga komitiba.

Nagpasa sigon it panibag-ong aplikasyon ro San Miguel matapos nga mapaso eon ro andang gindihon nga unang aplikasyon may pilang dag-on eon ro nakataliwan.

Ginpahayag ni Tejada nga kinahang-ean nanda it endorsement halin sa natungdan nga barangay ag lokal nga gobyerno.

Gin-aku man sigon it mga raya nga owa pa sanda nakapatigayon it pormal nga konsultasyon ag presentasyon bangud sa mga ginapatuman nga restriction daea it pandemya.

-- Advertsement --

Nauna eon nga nagpabutyag it pagkontra ro lokal nga gobyerno it Malay ag grupo it mga environmentalist sa pagpatindog it dam sa Nabaoy river bangud sa long-term effect sa palibot ag ro posibilidad nga magresulta it pag-submerged it pilang parte it lugar.

Nasayuran nga nagabalor it masobra P26.3 billion ro gina-proponer nga 300-megawatt hydro power plant nga ginakaeakipan it upper ag lower dam.

Boses ni SP member Jay Tejada