KALIBO, Aklan—Nagserbing inspirasyon para sa kadagayaan ro principal it Habana Integrated School sa banwa it Buruanga matapos nga mag-trending raya sa social media kat mabue-an it litrato samtang naga-construction sa mismong eskwelahan maskin nga gabi-i eon.

-- Advertising --

Suno kay Mr. Elmer Lumbo, principal it nasambit nga eskwelahan nga ginhingabot sigon nanda nga matapos ro konstruksyon kabulig ro daywang ka mga janitor ag sangka worker it pasilidad agud nga mai-submit sa ensaktong oras ro proyekto sa accounting division it Department of Education (DepEd)-Aklan.

Gintinguhaan sigon nanda rayang matapos agud nga makabuoe it last release it MOA nga nagakahaeaga it 159, 000 pesos bangud mabahoe sigon ro maibulig kara sa mga estudyante ag kaparehong manugturo.

Ginpahayag dugang nga owa nana ginaeauman nga mag-viral ro litrato nga ginbuoe it anang unga.

Gin-insister man kara nga bukon nana it intensyon nga magpasikat bangud ginhimo eamang nana raya agud nga makabulig sa anang ginadumaeahan nga eskwelahan.

Si Mr. Lumbo hay masobra tatlong dekada eon nga nagaturo kung siin pilang ka mga eskwelahan eon ro anang ginbuytan sa kabilugan it anang karera.

Samtang, padayun man nga naga-ani pagdayaw ro anang viral photo halin sa mga netizen.