KALIBO, Aklan—Halin sa dating P120 hasta P80 pesos, naga-abot eon it P280 hasta P300 pesos ro kada kilo it presyo it lokal nga pueang sibuyas.
Suno kay Josephine Geroy, sangka negosyante sa Kalibo public market nga mataas man ro andang bo-oe sa andang supplier sa siyudad it Iloilo rason nga owa man sanda it mahimo.
Ginpaathag pa nana nga normal nga nagataas ro presyo it sibuyas samtang nagapatapos ro dag-on bangud sa kakueangan it supply.
Kaeabanan sigon nga gina-ani ro sibuyas umpisa Enero hasta Abril ag haeos an-um nga buean ro ginaeawig kara.
Kada buean it Oktubre hay amat-amat eon sigon nga nagakaubos ro supply sa cold storage facility it mga traders nga andang ginapakyaw sa mga mangunguma rason nga nagamahae ro presyo.
Gindugang pa ni Geroy nga P280 pesos per kilo ro andang wholesale price rason nga haeos nga naga abot eon sa P300 pesos ro retail price it mga negosyanteng nagabakae kanda.
Bangud sa mahae nga presyo, in-demand makaron ro mga maisot nga sibuyas ag maskin ro mga naga angkon it sangkiri nga samad.
Sa pihak nga parte, nagapati ro negosyante nga bangud sa kawad-an it imported nga sibuyas eabi eon ro white onion rason nga grabe ro pagsirit it presyo it lokal nga sibuyas.
Samtang, owa sigon it nataeupangdan nga paghueag sa presyo it bawang ag kamatis.
