KALIBO, Aklan—Dismayado ro mga punong barangay ag pilang miyembro it Sangguniang Bayan it Makato sa kawad-an it aksyon it andang alkalde sa nagtuhaw nga maeapnagon nga pagbaha sa andang banwa ko nagtaliwan nga adlaw it Sabado tuga it na-eksperyensyahan nga Low Pressure Area (LPA).

Suno kay ABC President Bob Clyde Legazpi nga nagpatawag sanda it emergency meeting kaibahan ro mga miyembro it Sangguniang Bayan ag Municipal Disaster Risk Reduction Management Council (MDRRMC) para mai-plastar ro andang plano nga pagdeklara it State of Calamity sa banwa it Makato.

Apang, ginpaathag sigon it andang local chief executive nga owa imaw it nakikita nga rason para magdeklara it kapareho nga butang.

Kabaliskaran sigon raya sa nailistang damage assestment nanda sa mga kabarangayan nga naapektuhan it grabeng pagbaha.

Pila sigon sa mga barangay nga apektado it pagbaha ro Barangay Mantiguib, Cahilo, Calangcang, Poblacion, Dumga, Tina, Calimbajan, Tugas, Cayangwan, Aglucay ag Barangay Libang.

-- ADVERTISEMENT --

Dugang pa kara nga owa gid it ginhimo nga aksyon ro mga miyembro it MDRRMC ag ehekutibo para taw-an it bulig ro mga apektadong residente.

Gin-insister pa it opisyal nga maabo nga katangkihan, mga produkto sa eanas ag personal nga propyedad ro nasamad.

Tuyo sigon it andnag ginaduso nga pagdeklara it State of Calamity nga makapagguwa it calamity fund para mabuligan ro mga apektado it pagbaha.

Angot kara, gin-abisuhan eon sigon nanda ro mga residente nga magpasa it litrato sa andang barangay nga nagapakita it naging kahalitan it maeapnagon nga pagbaha para mapukaw ro igtueopangod it mga matas nga opisyal.

Boses ni ABC President Bob Clyde Legazpi