KALIBO, Aklan—Nagapahaum eon ro Provincial Health Office (PHO)-Aklan para sa igapatigayun nga tatlong adlaw nga vaccination drive halin Nobyembre 29 hasta Disyembre 1.

Ginpahayag ni Dr. Cornelio Cuatchon Jr. it PHO-Aklan nga nagpatigayun eon it orientation ro Department of Health (DOH) sa mga volunteer ag nursing student nga kaparte it nationwide campaign it national government.

Aminado si Dr. Cuachon nga nagakinahang-ean ro probinsya it maabo nga volunteers para maabot ro target it gobyerno nga 5 million jabs kada adlaw ukon 15 million nga mabakunahan sa sueod it tatlong adlaw nga Bayanihan, Bakunahan National COVID-19 Vaccination Days.

Raya suno kana hay bukas sa tanan nga naga-edad 12 hasta 17 anyo ag 18 anyos pataas nga mga pumueoyo.

Gina-engganyo man ro tanan nga owa pa nabakunahan sa nasambit nga age group nga magpabakuna eon para maproteksyonan ro pamilya ag komunidad kontra sa COVID-19 ag iba pang variants.

-- ADVERTISEMENT --

Dugang pa ni Dr. Cuachon nga importante ro pagbueoligan it gobyerno ag private sector para mapabaskog ro vaccination campaign sa bilog nga nasyon.

Sa makaron, naga-abot paeang sa 43.12 percent ukon 185,594 ro fully vaccinated nga mga Aklanon kung siin maeayo pa raya para maabot ro ginahandom nga population protection.

Nasayuran nga pirmado eon ni Pangueong Rodrigo Duterte ro Proclamation No. 1253 nga nagataeana sa Nobyembre 29 hasta Disymbre 1, 2021 bilang Bayanihan, Bakunahan National COVID-19 Vaccination Days.

Sa idaeom it kasuguan, nakabaehag nga indi dapat mabawasan it sweldo ro mga empleyado nga magapabakuna sa mga nasambit nga adlaw.

Boses ni Dr. Cornelio Cuachon Jr.