KALIBO, Aklan—Ginpaathag ni Dr. Cornelio Cuatchon Jr.  it PHO Aklan nga maskin 50 percent eamang ro efficacy rate it Sinovac vaccine kontra sa mild infection, 100 percent man raya nga  epektibo kontra sa grabe  ukon severe COVID-19 infection.

-- Advertising --

Raya hay matapos nga pila sa mga health worker ro nagaduha-duha pa nga magpa-inject it nasambit nga brand it bakuna.

Suno kay Dr. Cuatchon nga kinahangean nga 2 doses ro iturok agud nga makaangkon it  maximuim  protection.

Kapareho eang sigon raya sa iba pang bakuna kapareho it obra it Pfizer-BioNtech, Moderna ag AstraZeneca.

Mabahoe sigon ro maibulig kara sa paglikaw  sa grabeng COVID-19 infection.

Ro importante suno kana hay mabawasan ro severe cases nga kaeabanan nga nagaresulta sa  pagka-ospital ukon kamatayon.

Samtang,  ginkumpirma ni  Dr. Cuatchon nga may requerst ro provincial government kay vaccine czar Carlito Galvez  it  40,000 dose it sinovac para sa mga tourism workers sa Boracay, apang owa pa it sabat kara ro national government.

Suno kana nga owa naeakip ro Aklan sa mga priority list  bangud sa manaba nga attack rate it kaso sa probinsiya.

Madumduman nga opisyal eon nga nag-arangkada ro pagbakuna sa nasyon ko Lunes matapos nga mag-abot ko domingo nga adlaw  ro unang shipment it sinovac nga  donasyon it nasyong China.

Nagtaas man sigon ro kumpiyansa it publiko matapos nga magpaturok ro health workers ag pilang opisyal it gobyerno.

Sa oras sigon nga mabakunahan ro 70 porsiyento it populasyon hay makabig nga naabot eon kara ro ginatawag nga herd immunity.