KALIBO, Aklan—Ginpasaeamatan ni outgoing Provincial Director Police Colonel Ramil Perlito Perlas ro kahigayunan nga gintao kana it Philippine National Police (PNP) nga magretiro sa serbisyo sa kaugalingon kara nga probinsya.

Ginpatigayun ro retirement honor ni Perlas kahapon sa mismong compound it Camp Pastor Martelino sa bahin it Bgry. New Buswang, Kalibo.

Kaibahan sa mga nagtambong sa seremonya si Police Brigadier General Flynn Dongbo, Regional Director it Police Regional Office (PRO)-6 ag iba pang opisyal.

Magkahalong emosyon man ro nabatyagan ni Perlas sa anang ulihing diskurso sa atubang it anang mga kaibahan sa Aklan Police Provincial Office (APPO).

Si Perlas hay nagserbisyo it masobra tatlong dekada sa nasyon.

-- ADVERTISEMENT --

Sambilog imaw sa mga tampad nga police officer nga nagaprotekta sa kinamatarong ag kamaeayran it kada pumueoyo.

Ginkilaea man kara ro kahugod it mga katapo it APPO sa pagpabilin it kaayusan ag katawhayan sa bilog nga probinsya it Aklan.

Madumduman nga pormal nga nagpungko bilang Provincial Director it APPO si Perlas ko buean it Enero 2021.

Bukon eon it bag-o sa Aklan si Perlas bangud tumandok raya it banwang Numancia.

Nagserbi imaw bilang hepe it Regional Investigation and Detective Management Division (RIDMD) sa Police Regional Office – Caraga Administrative Region antes uman nga na-assign sa Aklan.

Nagserbisyo man imaw bilang Provincial Director it Agusan del Norte.

Boses ni PCOL Ramir Perlito Perlas