KALIBO, Aklan—Bangud nga gin-panaba eon sa storm signal No. 1 ro probinsiya it Aklan bangud sa bagyong Dante, uman nga ginpasugtan ro tanan nga  biyahe it  mga  motorbanca ag iba pang saeakyang pandagat  paagto ag paguwa it isla it  Boracay.

Ginpaathag ni Senior Chief Petty Officer Dominador Salvino, deputy station commander  it Philippine coast guard  ukon PCG-aklan nga bangud ro eawod sa katung-anan it Caticlan ag Boracay hay ginakabig nga special areas nga may matag-od eamang nga biyahe rason nga ginpasugtan eon nga makabiyahe ro mga pampasaherong motorbanca ag iba pang saeakyang pandagat.

-- Advertising --

Apang ro mga barko nga pahalin it  Aklan paagto  sa Batangas ag Mindoro ag pabalik hay nagapabilin nga bawae nga makabiyahe.

Sa advisory it Philippine Coast Guard (PCG)-Aklan,  gina-abisuhan ro tanan nga abangan eon lang ro andang  panibag-ong anunsyo.

Nakadepende sigon sa magiging masunod nga weather bulletin nga igapaguwa it Philippine Atmospheric, Geophysical and Astronomical Services Administration (PAGASA) kun hin-uno magabalik sa normal ro operasyon it mga barko.

Bangud sa maeain nga tiempo,  kapin sa 90 nga rolling cargoes ag 13 nga ka pasahero ro na-stranded sa Caticlan jetty port.

Gindugang pa ni Salvino nga padayun ro andang pag-monitor sa  napabalitang may pilang mga mangingisdang nasamaran it saeakyang pangdagat sa kasagsagan it pagbayo  ni bagyong Dante.

Ginlaygayan man kara ro mangingisda nga likawan anay nga magpaeayag agud nga makalikaw sa anuman nga maritime incident.

Boses ni Senior Chief Petty Officer Dominador Salvino

Samtang, bangud man sa mabaskog nga bubu it uean umpisa kabi-i, naka-experiensiya it hasta sa gutter deep nga pagbaha sa pilang lugar sa banwa it Kalibo ag iba pang banwa sa Aklan.