KALIBO, Aklan—Nakahaya eon sa andang residensiya sa Provincial Capitol Site, Kalibo ro eawas it tumaliwan sa pihak nga kinabuhi nga si dating Vice Governor Ronquillo “Kel” Tolentino.

Ginpangunahan ni vice governor Reynaldo “Boy” Quimpo ro opisyal nga pagputos it bandera it Pilipinas sa kabaong it dating opisyal kaibahan ro dating SP secretary ag makaron hay consultant nga si odon bandiola ag mga miyembro it Kalibo Municipal Police Station kaibahan ro pilang staff it Sangguniang Panlalawigan.

-- Advertising --

Nakataeanang igahatud sa anang ulihing paeahuwayan si Atty. Kel  sa Lunes nga adlaw, Marso 1, 2021 pagkatapos it  necrological mass ag memorial services nga maga-umpisa bandang alas-9 it agahon nga pagapangunahan it  Provincial Government  sa ABL Memorial Sports and Cultural Center.

Madumduman nga namatay ro dating bise gobernador ko Martes it aga-aga bangud sa gina-angkon nga baeatian sa edad nga 78.