KALIBO, Aklan—Padayun pang gina-imbestigahan it Malinao Municipal Police Station ro natabo nga foul play sa pagkamatay it sangka 22-anyos nga babaye ko Nobyembre 29 sa Brgy. San Roque, Malinao.

Suno kay PSSgt. John Yarre, imbestigador it Malinao Municipal Police Station nga insigida sandang nagpatigayun it follow up investigation matapos mabaton ro report nga may natabo nga suicide incident apang ko ulihi natukiban nga ginpatay ro biktima.

Mismong pamilya sigon ro nag-request nga ipaidaeom sa autopsy ro bangkay it biktima ag dikato natukiban nga may foul play nga natabo.

Unang gindaea sa ospital ro biktima sa pag-eaum nga nagpakamatay raya bangud nagabuea ro anang baba ag ilong.

Ginapatihan nga ro mismong 33-anyos nga live-in partner it biktima ro may kahimuan sa krimen.

-- ADVERTISEMENT --

Base sa inisyal nga pag-usisa it pulisya, ginasugid nga nakaangkon it diskuyon ro magtimbang nga parte ko gabi-i it dominggo ag una pa sa idaeom it impluwensya it makahieilong nga ilimnon ro suspek.

Desidido sigon nga magpasaka it kaso ro pamilya it biktima.

Sa makaron hay presenteng una eon sa kostudiya it Malinao Municipal Police Station ro suspek para sa nagakaigo nga disposisyon.

Boses ni PSSgt. John Yarre