KALIBO, Aklan—Gindepensahan it Municipal Planning Development Office (MPDO) ro andang plano nga pagbakae it tarpaulin printing machine para sa mga kinahang-eanon it lokal nga gobyerno it Kalibo.

Suno kay Engr. Marlo Villanueva it MPDO nga mabahoe ro matipid nga pondo it LGU sa mga printed materials engkaso nga makaangkon it kaugalingon nga printing machine ro Municipal  Economic  Enterprise  & Development Office (MEEDO).

Makabulig man sigon raya para makatao it income sa taeatapan.

-- Advertsement --

Gin-insister pa ni Engr. Villanueva nga importante ro papel it nasambit nga makinarya eabi eon sa mga ginapatigayun nga programa it LGU nga nagakinahang-ean it tarpaulin, poster ag iba pang printed materials.

Naga-abot sigon sa masobra P500,000 ro naga-gastos it munisipyo kada dag-on para sa pag-imprinta.

Nasayuran nga naga-abot sa P1 million ro ginproponer nga pondo para kara.

Samtang, ginpamalibaran man ni Engr. Villanueva nga may kahilabtanan sa nagahilapit nga eleksyon ro pagduso sa nasambit nga proyekto.