Kalibo Aklan———Magapangatubang sa kasong pag-eabag sa Sec. 20 it Republic Act 10591 ukon Illegal Possession of Firearms and Ammunition ro sangka padre de pamilya matapos nga madakpan nga nagahupot raya it illegal nga armas sa Brgy. Toledo, Nabas.

Una kara, nagpangayo it police assistance ro tagreklamong si Sharon Espinosa agud nga magpatunga kanda it asawang si Florante Espinosa, parehong sa legal nga edad ag mga residente man it nasambit nga lugar bangud sa grabeng away-mag-asawa.

Sa pagresponde it pulisya, naaktuhan si Florante nga may ginabuytan nga 38 kalibre it baril nga loaded it sangka bala.

Bangud kara, insigidang gin-aresto si Florante ag gindaea sa Nabas Police Station kon sa siin imaw sa makaron temporaryong nakakustudiya para sa nagakaigong disposisyon.