KALIBO, Aklan—Mas pang ginpabaskog it Office of the Provincial Veterinarian (OPVET)-Aklan ro andang monitoring para masiguro nga indi makasueod ro mga pork products nga kontaminado it African Swine Fever (ASF).

Suno kay Dr. Joseph Lachica it OPVET-Aklan nga nakipag-angot eon sanda sa Aklan Provincial Information and Communications Technology Office para magamit ro QR code sa mga naga-transport it baboy pasueod ag pagguwa it probinsya.

Ro nasambit nga QR code hay separado sa ginagamit it mga turista ag returning Aklanon bangud raya hay ginagamit eamang para sa may shipment nga meat products.

Tuyo kara nga mapadasig ro pag-inspeksyon it mga veterinary inspector nga naka-poste sa Caticlan Jetty Port.

Pwede sigon nga magparehistro kara online apang mas madasig ro proseso kung personal nga mag-adto sa andang opisina.

-- ADVERTISEMENT --

Dugang pa ni Dr. Lachica nga gin-umpisahan nanda ro dry run sa paggamit it QR code ko nagtaliwan nga buean kung siin naging maayos man ro implementasyon kara.

Samtang, ginpadumdum man ro mga biyahero eabi eon ro mga naga-uli it Aklan makaron nga tyempo it Paskwa ag bag-ong dag-on nga likawan ro pagdaea it karne it baboy bilang pasalubong eabi eon kung halin sa mga lugar nga infected it virus para iwas-aberya.

Sa makaron, nagapabilin pa nga eowas sa paeag it African Swine Fever ro probinsya it Aklan ag bilog nga Western Visayas.

Boses ni Dr. Joseph Lachica