Balitang Espesyal——-Sangka kompanya sa South Korea ro nag-imbento it high-tech nga dog collar nga makasarang nga mag-detect it emosyon it alagang ayam pinaagi sa klase it andang eahay .
Pinaagi sa “smart” dog collar nga himo it kompanyang Petpuls, posibleng ma-detect it mga amo kun ro andang alagang ayam hay masadya, masubo, balisa, akig, ukon relaxed.
Ma-obra raya it dog collar pinaagi sa pagbasa sa eahay it ayam.
Umpisa 2017, nagtipon ro Petpuls it 10,000 sample it eahay it kapin sa 50 nga breed it ayam ag halin sa mga nasambit nga sample hay naka-obra sanda it programa nga sarang nga mag-analisa it nagkaeain-eain nga klase it eahay.
Suno sa Seoul National University, 90 porsiyentong tama ro pagbasa it dog collar sa eahay it ayam rason nga raya hay masaligan agud nga masayuran ro andang mga emosyon.
Ko nagtaliwan nga Oktubre, gin umpisahan eon nga ibaligya it Petpuls ro andang produkto online sa balor nga $99 dollars ukon katumbas it P4,800 pesos.
