Kalibo Aklan——-Ginareklamo it pilang  mga nagalimpyo it nitso sa Kalibo Municipal Cemetery  ro kawad-an it  kita  sa nagahilapit nga  pista minatay makaron nga dag-on bangud sa COVID-19 pandemic ag pagsarado it  mga sementeryo.

Nasayuran nga umpisa Oktubre  29 hasta Nobyembre 2 hay sarado anay ro mga sementeryo bilang pagpangaman sa pagbuhos it mga tawo  bangud sa nagapabilin nga paeag it COVID-19.

Suno kay Nin Mationg,  sambilog sa mga nagapabayad sa paglimpyo  ag pagpintura  sa  mga nitso nga  kat owa pa it pandemya,  haeos  buhos eon ro mga tawo  sa mga sementeryo makaron nga tiempo .

Apang ro anda eon lang nga gina limpyuhan makaron hay ro mga museleyo it andang mga amo.

Kun dati sigon hay naga-overtime pa sanda sa kaabuon it mga nagapalimpyo , nagapatakod it lapida  ag iba pang pakyaw nga trabaho, makaron hay masyadong mahina ro kita bangud nga owa it masyadong tawo .

-- ADVERTISEMENT --

Naga-average sigon sa 100 hasta  300 pesos ro bayad sa pagpintura  it mga nitso depende sa kabahoe .

Ginpahayag dugang nga naeubtan man nanda ro sitwasyun bangud sa pandemya  ag nagaeaum sanda nga makabawi sa masunod nga mga dinag-on .

Sa pihak nga parte,  ginabawae gihapon sigon ro pagbaligya it mga  ambulant vendors  sa palibot it sementeryo .

Nasayuran nga pila sa mga kilaeang personalidad nga naka-eubong sa Kalibo Municipal Cemetery  hay sanday  dating Kalibo Barangay Captain Jean Rebaldo, dating Kalibo Mayor  Diego  Luces, dating  Gov. Corazon  Cabagnot ag iba pa.