Ginaduso makaron sa Kamara nga mataw-an it monthly subsidy ro mga ginikanan nga may “children with disability.”
Raya ro House Bill 6743 nga gindihon ni Davao City Rep. Paolo Duterte, Benguet Rep. Eric Yap ag iba pang kaibahan karang mamalidha.
Sa nasamabit nga proposisyong laye, ginaduso nga mataw-an it P2,000 nga monthly subsidy ro mga “eligible” nga mga ginikanan it mga onga nga “person with disability” ukon PWD, nga edad 21-anyos panaba.
Suno sa mga mamalidha, ro nasambit nga pinansyal nga bulig hay gina-eauman nga makabulig sa gastos ag iba pang kinahangean it mga pamatan-ong may kapansanan.
Mag-eowas kara, posisbleng magamit ro kwarta sa tunga it padayon nga pagtinaas it “cost of living.”
Engkaso nga raya naging eubusan nga laye, ro masakop kara hay tanan nga mga ginikanan it mga pamatan-ong may kapansanan, “as verified and certified” it Department of Social Welfare and Development ukon DSWD ag National Council on Disability Affairs ukon NCDA.
Sa idaeom it House Bill, kapin sa P2 billion ro ginaduso nga initial nga budget, ag ro dag-onang pondo mat-a hay iga-eakip sa General Appropriations.
Para man masiguro nga indi maabuso, nagplastar it mga nagakaigong penalidad sa mga maga-eabag ukon mapamatud-an nga may pang pagloko kapareho it pag-enrol sa kaugalingon bilang ginikanan it benepisyaryong PWD.