Kalibo Aklan ———–Nadakpan sa akto it sangka mister ro anang misis nga kaibahan ro anang kalaguyo sa andang ginadayunan nga boarding house sa C. Laserna St. Poblacion, Kalibo ko nagtaliwan nga domingo .

Base sa report,  ro mister hay gintago sa alyas nga “Boy”, 35-anyos, sangka overseas Filipino worker ag  tumandok it  banwa it Libacao.

Sa pihak nga parte,  nagapangatubang sa pag-eabag sa kasong adultery ro misis kara nga nakilaea sa alyas nga  “Girlie”,  32-anyos, tumandok it banga ag sangka public school teacher; samtang ro kalaguyo kara nga si alyas “Tisoy”, 25-anyos, owa it asawa ag  sangka pulis hay nagapangatubang man sa kaparehong kaso .

Ginasugid nga gin-sekreto it mister ro anang pag-uli sa nasyon halin sa masobra sa daywang dag-on nga pagtrabaho bilang OFW  ag ginsorpresa ro anang misis ag kalaguyo sa andang gina-istaran nga boarding house .

Ginpahayag dugang nga mabuhay eon nga nagaduda ro mister sa ginahimo it anang misis.

-- Advertsement --

Raya hay matapos nga samtang naga-akyod  sa ibang nasyon hay may mga nagapadaea eon kana it litrato ag mga impormasyon nga ro anang misis hay nahumaling sa sangka batang pulis .

Nahimo kara nga masundan sa lugar ro asawa ag kalaguyo kara .

Insigida raya nga nagtawag sa estasyon it pulisya ag nadakpan sa akto nga naga-iba ro magkabit.

Gin-aresto ro daywa ag ginkulong sa Kalibo Municipal Police Station , apang ginpahilway man matapos nga makapagpiyansa .

Nagapadayun pa ro imbestigasyon it  Aklan Police Provincial Office (APPO) sa nasambit nga insidente.

Ro mag-asawa hay may mga unga nga puro maintok pa.

Nasayuran nga ro suspek nga pulis hay nauna eon nga naging kontrobersiyal matapos nga magpasaka it reklamo kontra sa anang mga kabaro  sa alegasyon nga pagpanakit  ukon hazing  sa banwa it Buruanga.