KALIBO, Aklan—Ginklaru it sangka residente nga bukon it peke ukon edited ro litrato nga naboe-an it anang kaeapitbaeay, kun sa siin, may nakita nga sangka babayeng nakaputi it eambong, mahaba ro buhok ag matsa white lady sa  guwa it andang baeay sa housing project it National Housing Authority sa Brgy. Jugas sa banwa it New Washington.

-- Advertising --

Ginsaysay ni Mrs. Dolores Ibrada nga ko nagtaliwan nga adlaw bandang alas-11:30 it gabi-i hay masyado sigon nga  nangawa ro anang kaeapitbaeay nga si certain “Lara”  sa sobra kabahoe it buean rason nga ana raya nga ginboe-an it litrato.

Apang pagsueod sa andang baeay hay gin-check nana ro litrato ag eubus ro anang pagkakibot nga may babaye nga nakapungko sa prente it andang baeay nga matsa white lady.

Gin-post sigon kara  ro nasambit nga  litrato sa social media, apang matapos nga makabaton it mga batikos ag pagduda nga  raya hay edited, ginpakamayad nana nga i-delete eon lang.

Voice of Dolores Ibrada

Samtang, gindugang pa ni Mrs. Ibarada nga antes nga aksidente nga naboe-an it litrato ro misteryosong babaye hay naputos eon sanda it kahadlok  bangud nga  gina-alegar nga kada gabi-i hay matsa may nagatikang ukon nagakaeas sa ibabaw it andang atop eabi eon sa mga baeay nga may naga-istar nga nabdos.

Sigidas man sigon ro pagbinanghoe it ayam nga mas pang nagpatindog sa andang baeahibo bangud nga pamatyagan nanda hay may nakita raya nga maeain nga espiritu.

Voice of Mrs. Dolres Ibrada

May mga kahigayunan pa sigon nga pilang mga nabdos ro gulpi eamang nga nahushusan  ukon nagakamatay ro andang bag-ong tawo nga eapsag sa indi mapaathag nga kadahilanan.

Ginsaysay sigon it mga tumandok sa  lugar nga ginbutangan it housing project hay dating maligwin ukon kagueangan.

Gindugang pa nga may ginakuno-kuno nga aswang sa nasambit nga lugar, apang nagpamalibad sanda nga magmitlang it pangaean bangud nga owa man it nagakaigo nga pruweba.

Nasayuran nga haeos daywang dag-on eon sanda nga naga-istar sa lugar  ag ro pila sa andang mga nakadungan nga magbuho sa housing project hay naghalin eon bangud sa naexperiensiyahan nga kababalaghan.

Voice of Dolores Ibrada