KALIBO, Aklan—Pwede eon nga  magparehistro para sa COVID-19 vaccination ro mga edad 12 hasta  17  anyos sa probinsiya it Aklan.

Raya ro ginpahayag ni  Jay Lawrence Quinisio,   Nurse III  it Provincial  Health Office ukon PHO-Aklan.

Apang ginklaru kara nga  raya hay para sa online  registration pa eamang  samtang nagahueat it naka-schedule nga launching nga posibleng pagahiwaton  sa unang domingo it Nobyembre.

Madumduman nga gin-umpisahan sa nasyon ro pagbakuna sa  pediatric population nga may mga comorbidities  gamit ro Pfizer ag Moderna vaccines  matapos nga aprubahan raya it Food and Drug Administration  ukon  FDA.

Bangud nga prayoridad ro may health comorbidities, nagakinahangean  nga mag-presentar it medical certificate.

-- ADVERTISEMENT --

Sa mga ginikanan nga gustong pabakunahan ro andang mga unga,   ginalaygay it PHO nga mag agto eamang sa andang natungdan nga  barangay ukon health centers  agud nga mailista it andang mga LGUs.

Pwede man sigon nga mag-agto  sa facebook page it  provincial health office  agud nga ma-access ro  online registration link   ag pagkatapos hay maghueat it text notification.

Ro pagbakuna sigon hay pagahiwaton sa Aklan Provincial Hospital  bangud nga nagakinahangean it nagakaigo nga pasilidad bangud nga unang beses raya nga pagahiwaton.

Boses ni Jay Lawrence Quinisio

Sa pihak nga parte, gindugang pa ni  Quinisio nga  dere-deretso ro andang vaccination roll out  hasta nga may naga abot nga supply it bakuna.

Sa makaron suno kana hay  27% eon it prayoridad nga grupo ro nabakunahan nga masyado pang maeayo  sa target nga  70%.

Naging mahinay sigon ro pag abot sa herd immunity bangud nga maabu nga mga tawo ro nagapili it brand it bakuna.