KALIBO, Aklan—Nagpatigayun it public hearing ro mga opisyal it barangay Poblacion, Kalibo para talakayon ro pilang ka mga ordinansa kung siin sambilog eon kara ro may kaangtanan sa boarder’s registration system.

Tuyo kara nga mapadali ro pagtumod sa mga residente ag boarders engkaso nga may ginatao nga ayuda halin sa mismong barangay ukon munisipyo.

Nakabaehag man kara nga kinahang-ean nga magpa-rehistro ro mga boarder sa opisina it Punong Barangay para sa pag-isyu it ID nga may nakabutang nga litrato ag pilang ka mga impormasyon ag pirma it tag-ana.

Raya sigon hay may sang dag-on nga validity ag pwedeng i-renew.

Apang, engkaso nga maghalin eon it lugar ro natungdan nga boarder hay kinahang-ean kara nga i-surrender ro ID sa barangay.

-- Advertsement --

Dugang pa kara, ginakinahang-ean man it mga landlord ukon landlady nga maging responsable ag makipag-coordinate sa barangay angot sa andang boarder.

Nagapati ro mga opisyal nga importante ro pag-angkon it boarder’s registration system bangud kilaea ro lugar bilang sentro it komersyo ag edukasyon.

Ro kaparte it ginpatigayun nga public hearing

Sa pihak nga parte, gintalakay man sa nasambit nga public hearing ro may kaangtanan sa ginaproponer nga Disaster Risk Reduction Volunteers Ordinance.

Gin-insister it pilang opisyal nga dapat makaangkon it daywang ka mga first aider, disaster coordinator ag community welfare desk personnel sa kada Purok.

Tuyo sigon kara nga masiguro ro kaeowasan it publiko ag mapadali ro pagtao it bulig sa mga pumueoyo nga nagakinahang-ean sa oras it emerhensiya ag kalamidad.

Ro mga mapili nga volunteer sigon hay magapaidaeom sa nagakaigo nga seminar ag training kamana man nga pagataw-an it accident assistance.